ਨੰਗਲ : ਕਹਿੰਦੇ ਨੇ ਮੌਤ ਦੱਸ ਕੇ ਨਹੀਂ ਆਉਂਦੀ ਜੇ ਆ ਜਾਵੇ ਤਾਂ ਫਿਰ ਇਨਸਾਨ ਇਸ ਵੱਲ ਆਪਣੇ ਆਪ ਖਿੱਚਿਆ ਚਲਿਆ ਜਾਂਦਾ ਹੈ। ਇਹੋ ਜਿਹਾ ਇੱਕ ਮਾਮਲਾ ਅੱਜ ਬਾਬਾ ਉਦੋ ਨੰਗਲ ਘਾਟ ਤੋਂ ਸਾਹਮਣੇ ਆਇਆ ਜਦੋਂ ਇਕ ਨੌਜਵਾਨ ਆਪਣੇ ਦੋਸਤ ਦੇ ਨਾਲ ਘਰ ਤੋਂ ਮੋਬਾਈਲ ਠੀਕ ਕਰਵਾਉਣ ਲਈ ਨੰਗਲ ਆਇਆ, ਪਰ ਬਾਬਾ ਉਦੋ ਘਾਟ ਉੱਤੇ ਉਸਦੀ ਪਾਣੀ ਵਿੱਚ ਡੁੱਬ ਜਾਣ ਦੇ ਨਾਲ ਹੀ ਮੌਤ ਹੋ ਗਈ। ਹਾਲਾਕਿ ਉਸ ਜਗ੍ਹਾ ਤੇ ਪ੍ਰਸ਼ਾਸਨ ਵੱਲੋ ਚੇਤਾਵਨੀ ਬੋਰਡ ਵੀ ਲਗਾਏ ਗਏ ਨੇ ਕਿ ਪਾਣੀ ਵਿੱਚ ਉਤਰਨਾ ਮਨਾ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਨੰਗਲ ਦੇ ਨਾਲ ਲੱਗਦੇ ਪਿੰਡ ਸੰਘੇ ਤੋਂ ਦੋ ਦੋਸਤ ਮੋਬਾਇਲ ਠੀਕ ਕਰਵਾਉਣ ਲਈ ਨੰਗਲ ਆਏ ਸਨ। ਪਰ ਉਸਦੇ ਠੀਕ ਹੋਣ ਉਪਰ ਕੁੱਝ ਸਮਾਂ ਲੱਗਣ ਕਾਰਣ ਉਹ ਬਾਬਾ ਉਦੋ ਘਾਟ ਤੇ ਸਮੇਂ ਬਿਤਾਉਣ ਵਾਸਤੇ ਚਲੇ ਗਏ । ਪਰ ਓਥੇ ਇਕ ਨੌਜਵਾਨ ਦਾ ਪੈਰ ਫਿਸਲਣ ਕਰਕੇ ਉਹ ਡੂੰਘੇ ਪਾਣੀ ਵਿਚ ਡੁੱਬ ਗਿਆ। ਜਿਸ ਨੂੰ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਕੋਸ਼ਿਸ਼ ਨਾਕਾਮ ਰਹੀ। ਗੋਤਾਖੋਰਾਂ ਨੂੰ ਬੁਲਾ ਕੇ ਉਸ ਨੂੰ ਪਾਣੀ ਵਿਚੋਂ ਕੱਢਿਆ ਗਿਆ ਅਤੇ ਉਸ ਦੇ ਵਾਰਸਾਂ ਨੂੰ ਸੌਂਪ ਦਿੱਤਾ ਗਿਆ । ਮੌਕੇ ਤੇ ਪੁਲਿਸ ਨੇ ਪੁੱਜ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
