ਗੁਰਦਾਸਪੁਰ: ਦੀਨਾਨਗਰ ‘ਚ ਅਵਾਂਖੀ ਗੇਟ ਦੇ ਕੋਲ ਰਾਯਲ ਪੈਲਸ ਸਥਿਤ ਮੰਦਿਰ ਨੇੜਿਉਂ ਇਕ ਮਹਿਲਾ ਨੂੰ 3 ਮੋਟਰਸਾਈਕਲ ਸਵਾਰਾਂ ਵੱਲੋਂ ਹਿਪਨੋਟਾਇਜ਼ ਕਰਕੇ ਉਸ ਦੇ ਸੋਨੇ ਦੇ ਗਹਿਣੇ ਉਤਾਰ ਕੇ ਫ਼ਰਾਰ ਹੋ ਗਏ। ਵਾਰਦਾਤ ‘ਚ ਸ਼ਾਮਿਲ 2 ਵਿਅਕਤੀ ਤੇ ਇੱਕ ਮਹਿਲਾ ਸੀਸੀਟੀਵੀ ਕੈਮਰੇ ‘ਚ ਕੈਦ ਹੋ ਗਏ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਪੀੜਿਤ ਮਹਿਲਾ ਸ਼ਵੇਤਾ ਮਹਾਜਨ ਵਾਸੀ ਦੀਨਾਨਗਰ ਨੇ ਦੱਸਿਆ ਕਿ ਉਹ ਦੁਪਹਿਰ ਨੂੰ ਕਿਸੇ ਦੀ ਰਸਮ ਪੱਗੜੀ ਤੇ ਰਾਯਲ ਪੈਲਸ ਜਾ ਰਹੀ ਸੀ ਤਾਂ ਰਾਯਲ ਪੈਲਸ ਦੇ ਬਾਹਰ ਹੀ ਰਸਤੇ ਵਿੱਚ ਹੀ ਇਕ ਮੋਟਰਸਾਈਕਲ ਤੇ ਸਵਾਰ 2 ਪਗੜੀ ਧਾਰੀ ਵਿਅਕਤੀ ਅਤੇ ਇੱਕ ਮਹਿਲਾ ਨੇ ਉਸ ਨੂੰ ਅਵਾਜ ਮਾਰ ਕੇ ਸ਼ਿਵ ਮੰਦਰ ਦਾ ਪਤਾ ਪੁੱਛਿਆ।
ਇਸੇ ਦੌਰਾਨ ਹੀ ਉਹਨਾਂ ਉਸ ਨੂੰ ਹਿਪਨੋਟਾਇਜ਼ ਕਰਕੇ ਪੈਲਸ ਦੇ ਨਜਦੀਕ ਇਕ ਮੰਦਿਰ ਵਿਚ ਲੈ ਜਾ ਕੇ ਉਸ ਦੇ ਹੱਥ ਚ ਪਾਈਆਂ 2 ਸੋਨੇ ਦੀ ਚੂੜੀਆਂ ਅਤੇ 2 ਸੋਨੇ ਦੀਆਂ ਮੁੰਦਰੀਆਂ ਜਿਸਦਾ ਵਜ਼ਨ ਤਕਰੀਬਨ 6 ਤੋਲੇ ਸੀ, ਉਤਾਰ ਕੇ ਕਾਲੇ ਰੰਗ ਦੇ ਪਲਸਰ ਮੋਟਰਸਾਇਕਲਾਂ ਤੇ ਫ਼ਰਾਰ ਹੋ ਗਏ। ਜਦ ਥੋੜੀ ਦੇਰ ਬਾਅਦ ਉਸ ਨੂੰ ਹੋਸ਼ ਆਈ ਤਾਂ ਉਸ ਨੇ ਦੇਖਿਆ ਕਿ ਉਹ ਪੈਲਸ ਦੀ ਥਾਂ ਮੰਦਿਰ ਦੇ ਬਾਹਰ ਖੜੀ ਸੀ ਅਤੇ ਉਸਦੇ ਸਾਰੇ ਸੋਨੇ ਦੇ ਗਹਿਣੇ ਗਾਇਬ ਸਨ। ਉਹਨਾਂ ਇਸ ਘਟਨਾ ਸਬੰਧੀ ਪਹਿਲਾ ਆਪਣੇ ਪਰਿਵਾਰਕ ਮੈਬਰਾਂ ਨੂੰ ਸੂਚਨਾ ਦਿੱਤੀ ਅਤੇ ਉਹਨਾਂ ਇਸ ਘਟਨਾ ਸਬੰਧੀ ਪੁਲਿਸ ਨੂੰ ਸੂਚਨਾ ਦੇ ਦਿੱਤੀ। ਪੁਲਿਸ ਨੇ ਘਟਨਾ ਵਾਲੀ ਥਾਂ ਪਹੁੰਚ ਕੇ ਮੰਦਿਰ ਤੇ ਉਸਦੇ ਆਸਪਾਸ ਲੱਗੇ ਸੀਸੀਟੀਵੀ ਕੈਮਰਿਆਂ ‘ਚ ਉਕਤ ਲੁਟੇਰਿਆਂ ਦੀ ਫੁਟੇਜ ਲੈ ਕੇ ਉਹਨਾਂ ਦੀ ਭਾਲ ਸੁਰੂ ਕਰ ਦਿੱਤੀ।
